الطفيليات هي السبب الحقيقي لكل الأمراض؟ شاهد للنهاية

اخيرا.. عرفنا السبب الحقيقي لكل الامراض.. من اول الس-رط@ان لحد الامراض المناعية والسكر والتوحد والاكتئاب.. سبب واحد هو سبب كل الامراض دي.. السبب ده هو Parasites او الطفيليات.. والمؤسف ان كلنا حتى اللي مش مرضى ماعندهمش اي مشكلة من المشاكل اللي انا قولتها دي عندهم طفيليات.. الطفيليات تقدر تتحكم في سلوكك وميولك وحياتك كلها، لو دايما مخنوق ومكتئب ومتضايق من غير سبب فانت عندك طفيليات، لو دايما عندك كريفنجس وحاسة انك عايزة تاكلي حلويات وشكولاتات فدي علامة على ان عندك طفيليات.. حتى الاطفال الصغيرين عندهم طفيليات وكلنا محتاجين برامج تنضيف وتطهير قوية باستمرار
سمعتوا الكلام ده من حد غيري قبل كدة ولا دي اول مرة تسمعوه؟ ايا كانت الاجابة.. ففيه كلام مهم اوي لازم تسمعوه لو مهتميم بموضوع الطفيليات او شاكين ان عندكم طفيليات او عندكم طفيليات وعايزين تعالجوها.. فكملوا الحلقة لان الحلقة دي هتكون بمثابة مرجع فيه كل حاجة انتو محتاجين تعرفوها عن الموضوع ده

طبعا الكلام اللي انا بدأت بيه ده هو مجموعة آراء منتشرة انا ياما سمعتها من ناس كتير في جلسات، وياما شوفتها في فيديوز على السوشيال ميديا بيروجلها الاخوة المؤمنين بنظريات المؤامرة والكائنات الرمادية والحاجات اللي من النوع ده، ورأيي فيها باختصار انها آراء كارثية، بس اكبر مشكلة انها بتلاقي قبول كبير جدا عند ناس كتير لانها ببساطة بتقدم اجابة سهلة على اسئلة مالهاش اجابة واحدة، ومالهاش اجابة سهلة.. لكن الحقيقي ان مافيش اي دليل لا علمي ولا حتى منطقي على صحة الكلام ده.. طيب هل معنى الكلام ده اني بقلل من خطورة الاصابة بالطفيليات؟ لا.. هل هي مشكلة كبيرة؟ اه لكن هي السبب في التوحد والامراض المناعية واتساع ثقب الاوزون؟ لا طبعا ده كلام فارغ.. طيب امال ايه هي بقى الطفيليات؟ ايوووووة كدة بدأنا نسأل اسئلة صح عشان نقول الكلام المهم.. ولسه فيه كوارث تانية منتشرة عن قصة الطفيليات هنرد عليها ونوضحها خلال الحلقة

الطفيليات بمنتهى البساطة والوضوح هي كائنات بتحتاج لهوست او معيل عشان تعيش، ماتقدرش تعيش خارج الجسم الحي، منها انواع ميكروسكوبية لا ترى بالعين المجردة زي الاميبا والتوكسوبلازما.. ومنها الاكبر في الحجم زي الديدان الدبوسية والاسكارس والديدان الشريطية دي اشهر انواع الطفيليات اللي بتصيب الانسان.. ازاي بتصيب الانسان؟ عن طريق الاكل الملوث، المياه الملوثة، اللحوم اللي مش مستوية كويس لو هي حاملة لطفيلي ممكن تنقله، عشان كدة لازم برة البيت تكونوا منتبهين كويس اوي بتاكلوا فين لو بتاكلوا حاجة نية زي السوشي، او بتحبوا الستيك ميديم رير زيي.. الاطفال مثلا يلعبوا في التراب او في مكان مفتوح وبعدين ياكلوا من غير ما يغسلوا ايديهم كويس، كل دي طرق لانتقال الطفيليات.. باختصار البيئة حوالينا مليانة بالطفيليات.. يعني ممكن انا وانت والاستاذ والاستاذة نتعرض لحاجات ملوثة بالطفيليات.. هل كلنا الطفيليات تقدر تعيش في جيمنا زي بعض؟ لا.. وهي دي اهم نقطة في فهم الموضوع.. ان كلنا معرضين، لكن مش كلنا جسمنا عنده قابلية لاحتضان الطفيليات، لان جسمنا يكون بيئة مناسبة، يكون العائل المطلوب اللي الطفيلي بيدور عليه.. قدرة الطفيلي على انه يعيش ويكمل داخل جسمك ده دليل على انه فيه خلل، هو اللي سمح للكائن الضعيف جدا اللي مالوش اي لازمة الطفيلي ده انه يعمل فيك ده كله