كارثة تناول الدهون الصناعية برغم وجود بدائل طبيعية!

عمرك سألت نفسك ليه الدهون المهدرجة وحشة بس الدهون الصحية الطبيعية حلوة؟ مع ان الاتنين دهون؟ وازاي الدهون المهدرجة بترفع ضغط الدم اصلا؟
الدهون المهدرجة حاجة مصنعة مش شبه جسمك، فأول ما تاكلها جسمك يبص بقرف كدة ويقولك.. ايه يابني اللي انت جايبهولنا ده؟ (حط مشهد بدرية طلبة وهي بتقول ايه القرف اللي انتوا جايبينه ده؟) فعليا جسمك بيواجه صعوبة كبيرة جدا في التعامل مع الدهون المهدرجة، والنتيجة باختصار بتكون الكثير من الكوليسترول المؤكسد اللي بيتراكم على جدران الاوعية الدموية، يعني تكلس شرايين يعني شرايين اضيق.. مش بس تكلس وكمان التهاب، والتهاب يعني تلف وزيادة الحاجة للترميم وعلى المدى الطويل يتحول لتصلب شرايين يعني اوعية دموية فاقدة للمرونة.. اوعية دموية ضيقة ومتصلبة نتيجتها الطبيعية بتكون ضغط عالي واحتمالية مرتفعة للاصابة بالجلطات
والحل؟ امنع الدهون المهدرجة تماما اللي بتكون موجودة بشكل اساسي في الحلويات الجنك فود والاطعمة المعالجة والمعلبات، واستبدليهم بالدهون الصحية
صحيح احنا ماقولناش هو الجسم ازاي بيعرف ان الدهون الصحية افضل مع انها دهون بردو؟ لانها ببساطة شبهه، الجسم عارفها وحافظها وعارف كويس يتعامل معاها ازاي، فبيقدر يستخدمها في وظايف حيوية كتير زي انتاج الهرمونات وتجديد اغشية الخلايا، غير انها بتيجي مع مضادات اكسدة والتهاب بتدعم صحة الاوعية الدموية.. دهون صحية زي السمنة والزبدة الطبيعية وشحوم الحيوانات وزيت الزيتون وجوز الهند والافوكادو