مواصفات أغلى عسل في العالم
مواصفات عسل المانوكا الأصلي التي يجب ان تعرفها
لما تيجي تشتري اغلى واندر عسل في العالم، ماينفعش تشتريه من غير ضمان الجودة.. ضمان الجودة هو عبارة عن ٣ حروف + رقم لازم يكونوا موجودين على العبوة.. اللي هما ايه؟ UMF + رقم يتراوح بين +٥ و+٢٠.. نشرح الاول الحروف معناها ايه وبعدين الرقم الموجود معاها ده معناه ايه
UMF اختصار لـ Unique Manuka Factor .. عامل التميز الخاص بعسل المانوكا
اليو ام اف هي شهادة قوة واصالة وثبات عسل المانوكا.. لانها بتقيس ٣ حاجات..
MGO .. المادة الفعالة القوية اللي بيتميز بيها عسل المانوكا، اللي بتديله الخصائص العلاجية، وكل ما ارتفع رقم الام جي او اللي بردو بيكون مذكور على العبوة، ارتفع بالتبعية تقيمم اليو ام اف او الرقم اللي موجود جنب يو ام اف
بتقيس كمان Leptosperin .. وده عنصر مش موجود في اي نوع عسل في العالم الا في عسل المانوكا.. عشان كدة شهادة ام جي او ماتنفعش لوحدها، لان مركب الام جي او ممكن تتم زيادته اصطناعيا عشان ناخد رقم اعلى، لكن الليبتوسبيرين مش ممكن غشها عشان كدة تعتبر هي دي شهادة اصالة المنتج
واخد حاجة هي DHA – Dihydroxyacetone دي المادة اللي بتكون موجودة بشكل طبيعي في رحيق ازهار المانوكا، واللي بتتحول بعد كدة للام جي او مع التخزين الصحيح.. فدي الحاجة الوحيدة اللي تضمن ثبات واستقرار المواد الفعالة لفترات طويلة بدون ما تفقد فوايدها او تأثيرها
عشان كدة شهادة الام جي او لوحدها ماتعتبرش كافية لاثبات جودة ونقاء عسل المانوكا، لازم كمان شهادة اليو ام اف تكون موجودة.. وطبعا كمان كل ما ارتفع الرقم الموجود معاها كل ما ارتفع سعر العسل وزادت فوايده العلاجية
قبل ما نشوف انواع عسل المانوكا اللي انا بستخدمها وبثق فيها، فيه سؤال اخير لازم نجاوب عليه.. هل وجود كل التفاصيل دي على العبوة معناها اني بالتأكيد بشتري منتج جيد واصلي؟ لا.. مع الاسف الشديد لا.. ليه؟ لان زي ما قولتلكم الغش كتير جدا، ومافيش اسهل من اني اجيب عبوة املاها اي حاجة قوامها شبه قوام عسل المانوكا وابيعها على انها عسل مانوكا.. فمافيش شيء يضمن ان العسل اللي بشتريه اصلي وحقيقي غير المكان اللي بشتري منه، لازم اشتري من مكان موثوق؟ بالنسبالي انا مكان موثوق يعني ايه؟ اما موقع بيوفر بيتعامل مع الشركة المنتجة بشكل مباشر وبيوفر برامج رقابة واختبارات على المنتجات اللي بيوفرها ومابيتعاملش مع تجار عشوائيين، فانا هكون متأكدة اني كأني بتعامل مع الشركة المنتجة نفسها.. اما اتواصل مع الشركة المنتجة واطلب من خلالها دايركت.. وانا دول الطريقتين اللي انا شخصيا بشتري بيهم عسل المانوكا.. عمري ما اشتريته من سوبر ماركت ولا من صيدلية ولا حتى من موقع التجارة الالكترونية الشهير لان لا اثق في الشرا من تجار.. بشتري اما من ايهرب اما كنت بشتري من الشركة المنتجة دايركت، بس بعد كزا تجربة مع الشركة كان الاوردرات بتتاخر وقت طويل جدا او يحصل اخطاء مثلا توصلني حاجات غير اللي طلباها والتعامل معاهم مش سريع لان الشركات مابتفضلش التعامل مع الافراد، فبقيت دايما بشتري من ايهرب.. وده والله يا جماعة ماهو اعلان اشتروا من الحتة اللي تريحكم انا بقول تجربتي
آخر علامة بس دي هتعرفوها طبعا بعد الشرا هي الطعم والقوام.. عسل المانوكا يختلف تماما في الطعم والقوام عن اي نوع عسل تاني.. اولا القوام كريمي تقيل مش خفيف ومش مائل للسيولة زي العسل العادي، وده لان اغلبه مركبات ثابتة مش انزيمية فبيتبلور اسرع، وده بيديله قوام كريمي ومتماسك
بالنسبة للطعم عسل المانوكا مش غني جدا بالسكريات هو غني اكتر بالمركبات الدفاعية، وده بيخلي طعمه مش طعم العسل الحلو المتوقع، لا طعم اقل في السكر، مش مر لكن فيه سنة مرارة وبتزيد كل ما الام جي او ارتفع، مع لسعة خفيفة.. نقدر نقول طعمه دوائي اكتر، وعنده افتر تيست بيفضل شوية موجود
