لو بتستخدمي زيت جوز الهند شوفي هيعمل ايه لشعرك
اهم استخدام لزيت جوز الهند بالنسبة للشعر هو الترطيب.. المفارقة انك لما تيجي تستخدمي زيت جوز الهند وبعدين تغسليه تلاقي شعرك نشف جدا والنفشة اللي فيه زادت، وانا نفسي كان بيحصل معايا كدة.. فكنت بحس اما كل الناس اللي بيتكلموا عن زيت جوز الهند دول نصابين.. اما انا اللي فيا حاجة غلط بقى ولا دي باروكة ولا ايه مش عارفة.. لحد ما فهمت الساينس بيهايند بقى.. ركزي معايا
زيت جوز الهند بيحتوي على حاجة اسمها Lauric acid اللوريك اسيد عبارة عن حمض دهني جزيئاته صغيرة جدا، بتقدر تخترق الشعرة وترتبط ببروتينات الشعر.. ماهو شعرك اصلا عبارة عن بروتين اسمه الكيراتين، ومظهر الشعر التالف احيان كتير بيكون سببه فقد البروتين وتكسر الروابط الموجودة بين بروتين الشعر ده بسبب استخدام المواد الكيماوية والصبغات والحرارة
تقوليلي طيب ماهو ده كدة يبقى كويس اللوريك اسيد هيخترق الشعرة ويتربط بالبروتين المفروض ده اصلاح بقى، يبقى ليه الشعر ينشف اكتر ويهيش وينفش؟
اقولك.. اللوريك اسيد فعلا بيحمي البروتين ويمنعه من الخروج من الشعر، لكن ده مش معناه انه هيديكي افضل شكل وملمس.. اللوريك أسيد طبيعته انه حمض دهني صلب نوعا ما عشان كدة زيت جوز الهند بتصلب في الاجواء الباردة، فلما يدخل الشعرة بسبب طبيعته الصلبة الشعرة ماتبقاش مرنة، فلما تتعرض للرطوبة تتمدد وهي متصلبة فتظهر النفشة اكتر.. ده غير انه مش افضل حاجة في تسوية الكيوتكل، اللي هي الطبقة الخارجية من الشعر، ودي كل ما كانت غير مستوية وغير مترابطة الشعر يبان هايش
طيب ايه الكلام ده كدة معناه ان زيت جوز الهند وحش بقى مانستخدموش؟ هو الاستعجال اللي مودينا في داهية.. اصبري على رزقك يا حاجة
لا احنا هنستخدم زيت جوز الهند.. بس مش بتاع الاكل، زيت جوز الهند العادي اللي بنستخدمه في الاكل والاستخدامات العلاجية عني باللوريك اسيد، وهو ده اللي بيسبب المشاكل دي.. عشان كدة عملوا حاجة اسمها زيت جوز الهند المجزأ، وده مش اختراع جديد ده موجود في كل مكان ومغرق السوق، بس انتي لازم تبقي عارفة انتي بتختاري ايه بس
زيت جوز الهند المجزأ منزوع منه اللوريك اسيد.. بقى عبارة عن كابريليك اسيد بس.. سي ٨ وسي ١٠.. هو ده اللي هتستخدميه على شعرك لو شعرك هايش، بينفش، دايما اطرافه متقصفة وارفع بكتير من باقي الشعر، لو شعرك مابيطولش او بقيتي بتحسي ان الشعرة نفسها مش انسيابية ومطاطية
ليه بقى؟ لان زيت جوز الهند المجزأ مش بيخترق الشعرة، ده بيقعد على سطحها، ينعم الكيوتيكيل فشعرك يبان انعم وانسيابي اكتر، ومش بس المظهر، هو كمان بيمنع الرطوبة الزيادة انها تدخل للشعر فبيحمي شعرك من فقد البروتين وبيمنع الهيشان
وافضل طريقة لاستخدامه هي انك تحطي نقط بسيطة جدا منه حسب طول وكثافة شعرك بعد غسيل الشعر والشعر مازال مبلول شوية وفيه رطوبة.. هتحطي شوية صغيرين على ايدك وتوزعيهم على شعرك كله.. هيمنع النفشة ويقلل الهيشان ويحسن مظهر شعرك ويديله لمعة ونعومة افضل..
