الطفيليات بتختار تسكن جسمك ليه؟
لماذا تختارك الطفيليات؟
ايه اللي يخلي جسمك انت بالتحديد هو العائل المناسب اللي الطفيلي بيدور عليه
خلينا نلخص الاسباب دي كلها في كلمة واحدة وبعدين نشرحها بالتفصيل.. باختصار شديد ان تكون دفاعاتك منهارة، الجسم السليم عنده آليات دفاع طبيعية تقدر تقضي على الطفيلي وتتخلص منه بمنتهى السهولة أيا كان نوعه.. زي ايه الدفاعات دي؟ بردو خلينا نختصرها كلها في جملة واحدة وبعدين نشرحها.. الجملة دي باختصار هي نقص المعادن.. نقص المعادن هي اخطر حاجة تخلي الجسم هدف سهل ومكان مفتوح تمرح فيه الطفيليات على راحتها تماما.. طيب ازاي وليه؟ اقولك
المعادن زي الحديد والزنك والماغنسيوم والسيلينيوم.. المعادن دي مسؤولة عن سلامة الجهاز الهضمي كله وكل عمليات الحماية والفلترة لاي شيء بيدخل.. الجهاز الهضمي عنده ٤ دفاعات مناعية ضد الطفيليات معنى اصابتك بالطفيليات ان الدفاعات الاربعة فشلوا ودول كلهم مرتبطين بالمعادن
اول دفاع مناعي هو IgA ده عبارة عن بروتين مناعي، نوع من انواع الاجسام المضادة.. وظيفتها ترصد الطفيليات لما تدخل، مش بتقتلها لكن بتغلفها عشان تمنعها من اختراق جدار المعدة او الامعاء والالتصاق بيه.. لو الخلايا المناعية مش قادرة تنتج اعداد كفاية من IgA او كفاءة البروتين ده في القيام بدوره ضعيفة الطفيلي يعدي من خط الدفاع الأول.. طيب ايه يخلي مافيش اعداد او كفاءة كافية؟ نقص المعادن
تاني دفاع مناعي هو جدار الأمعاء نفسها.. كل جدار الامعاء ما كان قوي، مافيهوش نفاذية عالية، مافيهوش التهابات، فيه طبقة غشاء مخاطي محترمة.. الطفيلي حتى لو عدى من خط الدفاع الاول يواجه صعوبة في انه يمسك في جدار الامعاء ويلتصق بيه عشان يقدر يعيش.. طيب لو العكس؟ يبقى وصل لمكان المعيشة المفضل ويبدأ يعيش ويتكاثر ويتغذى على حضرتك بالبطيء.. طيب ايه اللي مسؤول عن صحة الجدار ده؟ المعادن.. لو عندك نقص معادن فانت تقريبا بتسلم نفسك تسليم اهالي
خط الدفاع المناعي التالت هو العصارة الصفراوية، إنزيمات الهضم، حمض المعدة اللي يقدروا يقضوا على اي كائنات دخيله مهما كانت قوتها.. ولو فيه ضعف او مشكلة في انتاجهم ده يسمح للطفيليات وغير الطفيليات، اي كائن حي ضعيف تافه يقدر يعيش في جهازك الهضمي، ماهي وكالة بقى من غير بواب.. طيب ايه اللي يسبب نقص الحمض والعصارة والانزيمات؟ اسباب كتير من اهمها بردو نقص المعادن
خط الدفاع المناعي الرابع هو حركة الأمعاء نفسها.. الأمعاء اللي بتتحرك بسرعة وبتتفرغ من الفضلات وبقايا الطعام بسرعة الطفيلي مايقدرش يعيش فيها، لكن لو عندك امساك وعسر هضم، هو يحب كدة اوي، ولما يجيلك يبطأ حركة امعاءك اكتر.. ليه وازاي؟ بردو كلها لعبة معادن.. نقص المعادن يعملك امساك، والطفيلي وجوده يزود نقص المعادن فالامساك يزيد
طيب ايه بالتحديد المعادن اللي نقصها يسبب كل المشاكل دي؟ حديد، زنك، ماغنسيوم، سيلينيوم.. الاربع معادن دول نقصهم يعتبر سبب ونتيجة للاصابة بالطفيليات
وطبعا فيه اسباب تانية، اغلبها مرتبطة باللي قولناه لكن بطرق مختلفة.. يعني ضعف حمض المعدة ليه اسباب تانية غير نقص المعادن زي ضعف الكبد، التوتر المزمن.. خلل الميكروبيوم بسبب الاكل الغلط او تناول المضادات الحيوية بشكل متكرر.. عموما اي خلل مناعي او خلل في الجهاز الهضمي او التهابات مزمنة تسمح بوجود الطفيليات، الطفيليات بتقولك ان كان فيه خلل اصلا او ضعف هي بس استغلت وجوده
