مواصفات الماتشا الأصلي ✅

الماتشا او الماتشا حسب بتقولوها ازاي حداكو في البلد، انا بقول ماتشا عادي عشان ماترفعوش سقف توقعاتكم مني اكتر من كدة.. طبعا شاي الماتشا رغم انه مشروب دخيل على ثقافتنا الا انه اكتسب شهرة وشعبية كبيرة جدا مؤخرا.. مانقدرش ننكر انه اكتسب الشهرة دي لانه تريندي لكن الحمدلله اخيرا ترند له فايدة.. ماحدش يقدر ينكر طبعا ان شاي الماتشا مفيد جدا جدا لانه الاعلى بمضادات الاكسدة من كل انواع الشاي المتوفرة، ولانه الاعلى في احتواؤه على الال ثيانين المركب اللي بيدي شعور بالهدوء والصفاء الذهني مع الكافيين المنبه، فيديك تركيز من غير توتر.. لكن هل كل الكلام اللي انا قولته ده ينطبق على كل انواع الماتشا؟ طبعا لا.. شاي الماتشا فيه منه جريدز مختلفة كتير جدا جدا لدرجة غريبة عجيبة.. من اول اعشاب لونها اخضر بتتباع على انها ماتشا وهي مش ماتشا ولا تعرفها، لحد السيريمونيال جريد ماتشا واللي دي بردو درجات بتحددها مواصفات كتير.. وكل ما عليت بالجريد عليت بالفوايد وبالتأكيد عليت بالسعر كمان
فتعالوا نشوف ايه مواصفات شاي الماتشا الجيد، وايه اللي تدوروا عليه لما تيجوا تشتروا الماتشا، كل نوع ينفع لايه، وازاي نتجنب الانواع السيئة من الماتشا، واللي هي بالمناسبة مش رخيصة ابدا وبتتباع بنفس اسعار الماتشا متوسطة الجودة مثلا.. فلو بتشتري ماتشا كتير الحلقة دي تهمك عشان تقدر تاخد افضل قيمة مقابل سعر وماحدش يضحك عليك

شاي الماتشا في الاساس مشروب ياباني، عشان نحصل على محصول ماتشا جيد اصلا لازم زراعة الشاي تتم في مناخ معين، المناخ ده موجود فين؟ في اليابان وبالتحديد في ٣ مدن Uji / Nishio / Shizuoka .. لو الشاي جاي من اليابان يبقى جيد، ولو من مدينة من التلاتة دول يبقي عالي الجودة.. طيب مش مذكور هو جاي منين اصلا؟ او هو منتج امريكي مثلا او جاي من اي مكان تاني في العالم.. سيبه وامشي.. بس

طيب زرعنا الشاي في اليابان؟ الماتشا بيختلف عن كل انواع الشاي التانية بسبب عملية التظليل.. ايه عملية التظليل دي؟ انه النبات يتغطى يعني يفردوا فوقه حاجة تحجب الضوء المباشر لمدة ٢٠ – ٣٠ يوم قبل الحصاد.. عملية التظليل دي اهميتها انها هي اللي بتخلي الشاي يكتسب اللون الخضر الزمردي الخاص بشاي الماتشا، اللي بيكون اهم علامة جودة في الشاي، الماتشا كل ما كان لونه باهت او مصفر كان معناه انه نوع غير جيد وغالبا مخلوط.. طيب هل ليها قيمة تانية غير موضوع اللون؟ طبعا.. الماتشا بيتميز باللون الاخضر الزمردي ده بسبب محتواه العالي من مركبات الال ثيانين، ودي بتدي تأثير مهديء رغم محتوى الكافيين العالي، فتدينا تركيز عالي بس بدون توتر.. عكس انواع الكافيين التانية اللي محتواها من الال ثيانين منخفض.. طيب نعرف ازاي ان شاي الماتشا اتعرض لعملية التظليل دي؟ خصوصا انه غالبا بيكون محفوظ في علب او اكياس مش بتبين لونه الحقيقي؟ بيكون مكتوب على العبوة Shade-grown .. ودي واحدة من علامات الجودة لشاي الماتشا