ضاعف فوائد الصيام وفعل جينات الالتهام الذاتي
هل فيه حاجة تقدر تعزز فوايد الصيام؟ احنا اهم حاجة بتحصل في الصيام لسه اساسا ماقولناش عنها ولا كلمة.. autophagy الالتهام الذاتي..
معجزة الصيام، اهم حاجة بتحصل في الجسم اثناء الصيام هي autophagy الالتهام الذاتي.. اول ما الجسم بيدخل في حالة الالتهام الذاتي بيبدأ يتخلص من بقايا الخلايا التالفة ويستخدمها كمصدر للطاقة، ويبدأ ينضف نفسه ويدخل في حالة الاصلاح والصيانة، وبسبب السترس اللي بيسببه الصيام وغياب مصدر الطاقة لفترات طويلة، الجسم بيبدأ ينتج ميتوكوندريا جديدة، الميتوكوندريا اللي هي وحدات انتاج الطاقة، واللي هي باختصار حالتها هي اللي بتقولنا حالة جسمنا عاملة ازاي.. الميتوكوندريا سليمة احنا تمام وبصحة، الميتوكوندريا ضعيفة، دخلنا في امراض ومشاكل شيخوخة حتى لو عمرنا الفعلي اصغر بكتير.. فأفضل خدمة نقدمها لجسمنا اثناء الصيام هي اننا نساعد الجسم انه يدخل في حالة الاتوتوفجي او الالتهام الذاتي اسرع عشان نستفيد من وجود جسمنا في الستيت او الحالة دي اكتر.. هل فيه حاجة بتعمل ده؟ اه.. مركب اسمه السبيرميدين
ايه السبيرميدين ده؟ السبيرميدين ده مركب طبيعي موجود في الجسم لكن بيقل انتاجه مع العمر.. بيكون كمان موجود في انواع معينة من الاكل زي المخمرات والمشروم والبكتيريا النافعة في الامعاء، لكن مانقدرش نحصل منه كميات كبيرة من الاكل عشان كدة بييجي بتركيزات اعلى في المكملات الغذائية
طيب ماله السبيرميدين؟ بيعمل حاجات كتير مهمة، لكن اهمها مع الصيام انه بيفعل جينات الالتهام الذاتي مباشرة.. ATG genes هي مجموعة جينات موجودة في اجسامنا مسؤولة عن تفعيل عمليات الالتهام الذاتي، السبيرمدين بيشتغل عليها فورا، يقولها قومي لو سمحتى شوفي شغلك، تقوم الجينات دي تروح للخلية تقولها يلا عندنا ترويقة، تنضيف عميق النهاردة مش من على الوش، وتقوم عاملة حاجة اسمها Autophagosome تقوم مدية الخلية كيس تقولها اتفضلي اي نفايات عندك، افصليها لوحدها وحطيها في الكيس ده، وبعدين تاخد الكيس ده مش ترميه بقى، لا تعمله اعادة تدوير، نستخدم النفايات دي كمصدر للطاقة.. يعني تنضيف للجسم بدون هدر، وده يخفف من سترس الصيام وغياب مصادر الطاقة على الجسم
طيب تفعيل جينات الالتهام الذاتي باستخدام السبيرميدين مع الصيام بالتحديد يعمل ايه؟ الصيام يهيأ الجسم للدخول في الاوتوفجي، تفعيل الجينات يبدأ التنضيف العميق بسرعة وبإجهاد اقل، وده مهم جدا كل ما تقدمنا في العمر، لان احنا ممكن نهيأ البيئة للاوتوفجي بالصيام، لكن جسمنا مش قادر يفعل الجينات، و هنا بييجي دور المكملات زي السبيرميدين
استخدام السبيرميدين يدينا فوايد صيام طويل جدا في فترة اقصر بكتير.. يعني ناخد فوايد ٤٨- ٧٢ ساعة صيام بصيام ١٦-٢٤ ساعة بس.. وده ينفع على فكرة مع الصيام الجاف والصيام المتقطع كمان، يعني ممكن نستخدمه بعد رمضان عادي
طيب هل الكلام ده مثبت علميا ولا جدعنة من عندي كدة؟ فيه دراسة كبيرة اتعملت على ناس بتستهلك كميات اكبر من السبيرميدين وجدت عندهم مستويات عمر اطول ووفيات اقل بالسرطان وامراض القلب.. والتأثير كان مستقل عن نظام الاكل والرياضة والوزن، يعني الاستفادة كانت من مركب السبيرميدين نفسه
السبيرميدين جرعته اليومية من ١-٦ مليجرام يوميا، لكن اغلب الدراسات كانت على جرعة ١-٣ مليجرام بس وبيتاخد بعد السحور بنص ساعة، مش لازم نخلص اكل مع الادان
