ليه جسمي مارجعش طبيعي بعد استئصال الغدة الدرقية؟
ماذا بعد استئصال الغدة الدرقية؟
طبعا دلوقتي لو انتي بتشوفيني وعملتي استئصال للغدة الدرقية، فانتي اكيد بتاخدي ثيروكسين او الليفوثيروكسين، اللي هو البديل الاصطناعي لهرمون الغدة الدرقية، ومافيش اي نصيحة تانية اخدتيها من اي نوع.. هتكوني محتاجة ايه تاني يعني؟ ماحنا خلاص شيلنا الغدة الدرقية واديناكي الهرمون اللي كانت بتطلعه.. خلصنا مش محتاجة دراما يعني
طيب لو فعلا فعلا يعني الهرمون الاصطناعي كان كافي ليه طاقتك مارجعتش زي الاول؟ ليه حرقك مارجعش زي الاول؟ ليه لسه عندك انيميا وجسمك بيوجعك وشعرك بيقع وحاسة انك كبرتي ٢٠ سنة على عمرك؟ لان الهرمون الاصطناعي مش بديل للغدة الدرقية.. قبل ما تفهميني غلط انا مش ضد الهرمون الاصطناعي في الحالة دي.. لكن بالتأكيد لوحده مش كفاية.. فيه حاجات تانية كتير انتي محتاجاها هكلمك عنها كلها
شوفي يا ست الكل.. فكرة اننا نشيل حتة من الجسم ونرميها عشان كان فيها مشكلة دي بتحصل كتير، يعني فكرة ذ جدا في الطب الحديث، غدة درقية بقى، مرارة، رحم، لوز حاجات كتير كدة، وفي معظم الحالات ماحدش بيهتم اصلا بفكرة تعويض وظيفة العضو اللي تم استئصاله ده كأنه كان زينة، ديكور كدة مالوش اي اعتبار
التحدي اللي بيواجهنا مع الهرمون.. هو احنا هنعمل ايه مع الوظايف التانية اللي الغدة كانت بتقوم بيها ومابقتش موجودة عشان تقوم بيها؟
اولا لازم اكلك يكون نضيف عشان تخفي الحمل عن الكبد والكلى، لان العضو كل ما كان مجهد مش هيقوم بوظايفه الحيوية بالشكل الامثل.. بلاش حلويات وسكريات وجنك على الاقل ركزي على الاكل الطبيعي واهتمي ان دايما مستويات السكر في جسمك تكون منتظمة
ثانيا.. اهم عنصر على الاطلاق لتحويل ت٤ لت٣ هو السيلينيوم.. دايما كنت بأكد ان اليود والسيلينيوم اهم عنصرين للغدة، لكن بعد الاستئصال اليود نوعا ما بيفقد اهميته لان الغدة مابقتش موجودة عشان تستخدمه لانتاج ت٤، طبعا هو مهم لخلايا وانسجة تانية، لكن بالنسبة لهرمونات الغدة في الحالة دي خلاص فقد وظيفته.. لكن اهمية السلينيوم بتتضاعف.. لانه اهم عنصر لانتاج انزيم الديوداينيز اللي بيقوم بعمليات التحويل.. هتحتاجي ٤ حبات من الجوز البرازيلي يوميا، ضعف الجرعة اللي محتاجها الشخص العادي، دول هيدوكي احتياجك من السيلينيوم
ثالثا.. صمغ الجوجول، ده نوع من الراتنج، اتكلمت عنه اكتر من مرة قبل كدة، بردو ده مهم جدا كمان بيحفز تحويل ت٤ لت٣.. تقدري تستخدمي مستخلصات الجوجول طبعا موجودة وتقدري تلاقيها بسهولة هسيبهالك في التعليق المثبت
رابعا الزنك.. لو عندك نقص في الزنك جسمك حتى لو قدر يحول ت٤ لت٣ ممكن مايقدرش يتسخدمه، لان نقص الزنك بيضعف مستقبلات الهرمون في الخلايا، فماينفعش باي حال من الاحوال يكون عندك نقص في الزنك.. هتلاقي كل تحاليل الغدة بتاعتك تمام ان رينج، لكن كل اعراضك بتقول غير كدة، لازم تحافظي على مستويات الزنك.. وفي الحالة دي انتي هتحتاجي الزنك يكون موجود باستمرار او على الاقل تكرريه كتير.. ومنعا لتراكم الزنك او ان مستوياته ترتفع عندك، فيفضل انك تاخدي الزنك المستخلص من الاطعمة الكاملة هول فود.. هسيبهولك بردو في التعليق المثبت
رابع حاجة هي مكملات البيف اورجانز، اعضاء الحيوانات، مش مكملات انسجة الغدة الدرقية، لا اعضاء الحيوانات.. طيب ليه؟ عشان هتديكي عناصر ضرورية كتير بالنسبالك.. حديد، ب١٢، وفيتامين أ.. كل دول لو عندك نقص فيهم بردو ده هيعرضك للانيميا وهيضعف عمليات التحويل، ومكملات البيف اورجانز تعتبر مصدر نضيف وطبيعي لكل العناصر دي.. طيب لو مش قادرة اشتريها؟ يبقى لاز م تاخدي وجبة مكونة من اعضاء الحيوانات مرتين في الاسبوع على الاقل.. كبدة، قلب، كلاوي.. اي حاجة زي كدة
عندنا بعد كدة تحدي تاني اسمه غياب هرمون الكالسيتونين اللي قولنا بينظم الكالسيوم والفسفور، او بمعنى ادق بيلعب دور في تنظيمهم مع فيتامين د وجارات الدرقية.. نعمل ايه بقى في القصة دي؟
اولا لازم تتعودي تشيكي على هرمون جارات الدرقية بشكل دروي.. تحليل دم بسيط تكرريه مرة كل ٦ شهور اسمه PTH test
عشان تطمني على وظيفة جارات الدرقية..
ثانيا وده الاهم ماينفعش بأى حال من الاحوال مستويات فيتامين د تقل عندك ١٠ الاف وحدة دولية من فيتامين د٣ مع ١٠٠ ميكروجرام من فيتامين ك٢ يوميًا مش مرة في الاسبوع.. وبعد مدة لا تقل عن ٨ اسابيع ممكن تنزلي ل٥ الاف وتثبتي الجرعة دي لان فيتامين د هيكون شيء ثابت في حياتك
